我都係收2手料啦,但都隔左排先決定真係請既,主要係老闆真係好想有人返工
咁俾左offer之後新人就話本身長散都要俾7日通知,所以到呢個星期三先正式返工

返工既第一日,新人9點都未出現
同事就以為佢唔黎啦,仲出去門口睇下
但係admin同事話佢有打黎話會遲,但講到一舊舊咁...結果佢係9點04分到公司
佢個理由係自己"行錯路"

回帶返上次funny唔做個陣我地有吹過水話如果面試遲個D唔駛請啦,公司唔會改變到同事遲到既,而呢間公司個老闆係極討厭人遲到(但唔介意早退)

然後新人見工個陣冇遲,但返工就遲...

坐低就做D例牌野,呢D冇特別
大慨到10點零咁上下?佢就捉左sales入房傾野
佢問話人工可唔可以加,因為唔知道觀塘坐車食野咁貴

第一日返工飯都未食就食野貴?????????

呢個係我聽到個陣既反應

sales都好驚訝啦,問佢有冇諗住帶飯個D,佢話又唔方便啦,然後又話之前返尖沙咀食飯都係30幾蚊一餐(好想佢介紹邊間食到30幾蚊)

sales聽完佢D廢話之後就直接問
咁你不如開個實數我去問下啦,你唔駛咁快答我都得諗清楚先

結果呀新仔即日過左一陣間就答左

佢只係需要加1000蚊

?????
聽到我差D晌公司大笑

咁呀sales經funny一事已經長一智,覺得kam 撚不宜久留,簡單D佢唔想教完一輪原來係不可教化既又趕佢走哂大家時間

但都仲想俾D機會啦,一齊出去食welcome lunch

個間野係寫紙仔再去落單既,坐低咪大家睇menu,通常我都係寫紙冇咩特別,但佢睇完食咩之後突然又爆左句「呀其實都唔係好貴」

.............你個故事作左就跟返條路線好嗎?

我聽到都呆一呆,之後填完單sales就拎左去買
sales行開左之後新人就立即拎個手機出黎玩,完全冇打算吹水,咁我咪都睇電話
到sales返黎睇到咁都睇左陣,跟住我地兩個就自己晌度吹水,呢幾日話題都係不離鏡仔追女神啦,咁就講起呢類野,但新人完全冇打算加入,繼續睇電話

佢既睇電話就只係不斷掃來掃去,而唔係真係有野睇or打機...即係只係zip時間(呢個時間裝防偷窺既我簡直有先見之明)

然後sales見到佢個畫面有貓wallpaper,就隨口問「你都有養貓架?」佢只係回左佢係呀但走左了就句點左我地

呢個時候野食到就大家安靜食飯

其實呀姨咁大都係第一次食welcome lunch會deadair

sales都幾confirm自己唔想要呢個人做同事
個日下午我同佢出去睇位,就講起呢樣野

我就覺得食飯個陣好似茶餐廳搭台

佢話覺得好似交友APP約出黎之後見到樣覺得唔ARM然後唔出聲食完野就走個種FEEL
雖然好衰但我覺得講得好好笑

第2日冇遲到啦,佢係58分入門口
個日佢中午要同sales出去睇位,其實睇完就收得工了
中間冇咩特別啦佢就坐晌度睇下D Catalogue等等,中午出去食飯都遲左返公司
後來到出街,sales傾開話呢個部門既同事習慣左好早就返公司做野,大佬如果多野搞佢7點幾可能已經坐左晌度,提起好早起身呢個問題,問佢如果要早D返佢有冇問題咁啦
新人自己住大西北,佢聽到話同事5點幾起身好快就答「咁咪好似D呀婆咁」強烈表示自己58分到公司已經係最早架啦,簡單講呢個問題有好多個答法,但係佢個答法就係自殺小隊既隊友...而咁樣答野係幾唔ARM做sales

(我唔認同既,但的確係會早大慨10分鐘入公司,而搵工會考慮埋返工距離問題,所以冇發生過要大西北出南區返工呢D咁錯配既事)

咁sales都幾明確話其實佢唔太ARM我地公司同呢個工作,佢就話自己其實好想做呢份工既
同事俾個機會話咁依家冇時間傾了,如果你仲想就跟上去睇位,唔想的話就俾返公司卡然後可以走
佢既選擇係俾返張卡同事,但同時又話自己真係好想做份工

Well好在今次真係有夠果斷
kam 撚立即處決...

尋日都分析返件事
佢既主要死因:
1. 一返工就講話底薪唔夠
理由可笑到當人弱智,錢唔夠做咩take offer先?
你要講都返左幾日至少真係食左飯先好講
當我地幾個年紀大D就呃到???

你依家第一個sell既對象係同事,都未俾人睇到表現就已經要錢

叫你諗清楚要幾多錢你又唔夠guts開得個1000蚊...

2. 第一次食飯態度
拿,如果有日要同客食飯都係一坐低就玩手機咁點?你點表現到我只係對你地係咁,對客唔會係咁呢件事俾人睇? 第一日返工就係博表現

又要做自己,又要人課金解鎖成就???

如果個小朋友係第一份工,佢咁樣我都會覺得有可教化既可能性

但係3X既中年男士...ERRRR唔好啦

不過作為笑料收集者同埋學下個世界有幾大
都算係一個好笑既笑話黎,多謝公司課金俾我睇kam撚表演

住大西北番觀塘的確死路一條，龍翔道三不五時就出事，要保住全年唔遲到個人覺得係冇咩可能既事XD作為曾經住大西北人表示，如果唔係住正屯馬線附近，日日要我轉幾程鐵番觀塘我寧願放棄份工XD阿KAM性格聽落完全唔係做SALE屎既材料，做乜咁睇唔開揾份SALE 屎工攞苦黎辛

kimyhaha: 其實我係會揀地區個D人,你搵工個陣已經要予估自己返工時間係點,點樣出門先正確,老實我住將軍澳根本就唔考慮過左觀塘線既工,而揀得大西北返KT就予左要早好多出門同埋有機率遲,至於性格呢個都真係返左工先知係咁