Day 1 二零二二年九月二十九日 (四)
同德文班同學一齊去慕尼黑四日三夜。行程、酒店都plan得好急，因為
一、一直以為啤酒節Oktoberfest [十月節]係十月搞，點知係由九月十七搞十月三號就完 *?!!
二、好遲先知課程假期。

夾著放學，中午搭一程ICE (長途火車)由科隆去慕尼黑，原定12:36出發，17:38到達。

因為mark位要加錢，冇mark到。咁就要上車睇座位有冇記號，呢架ICE既記號，係座位側用螢光幕顯示由邊個站到邊個站會有人用呢個位，冇mark野就可以任坐。

可能因為呢個週末啤酒節就完，架車好full，我揾唔到位坐。最後去左餐廳。餐廳位好闊落，仲有枱用! 坐餐廳當然要嗌野食，不過只嗌飲品都得，我叫左一杯3,6歐(1歐羅=7.66港錢)既熱朱古力，呢個價坐四人卡位(對面一個人)到落車，抵曬啦。

四點左右，因為鐵路問題要架火車行返轉頭、改道。44,90歐一程ICE，搭多兩個鐘，抵啊哈哈 要搭ICE搏飛機既話真係要小心。
餐廳後來有位，叫左同學過黎坐。有個人傾下計都好啲，如果唔係真係悶死。車上有wifi，但唔穩定到同冇一樣。

附圖係一、火車走廊上既mon。二、通知架火車要delay後派既餅。

最終我地夜晚7點半到步。本來諗住先去酒店放行李，快手去市內行個圈，因太遲到步作罷。
晚餐我地order左附近Backwerk (連鎖面包店)既Too Good To Go**驚喜包。可以由19:30至20:00領取。我地遲左2分鐘到，店面已經清曬，收銀機都收埋 我一到就即係道歉，個店員又真係真接講我地遲到，不過見到我又細粒又咁誠懇，大概唔係太唔高興，佢比左十個包我地。

三歐羅(HKD 23左右)，十個有餡既包 !!我住個區既Backwerk驚喜包通常得五、六個包 (已經好抵)。呢十個包我地食到最後一日仲有剩兩個。生得矮有時都有好處。

*啤酒節以前係十月搞既，但因十月普遍天氣較差，就提早搞。
**Too Good To Go係一個app，餐廳、超市、面包店時有剩食，合作商家用低價以驚喜包形式賣出剩食，用家冇得揀內容物。雖然話係「剩食」，但食物狀態通常都極好。視乎舖頭，可以換到價值相等至五倍價值既食物。合作商家以面包舖居多。

~~~~~~~~~~~~~~~~~~~~~~~~~~~~~~~~~~~~

酒店資訊：
入住酒店Hotel Graf Lehndorff，位於S-Bahn車站Riem。離慕尼黑主車站München Hauptbahnhof(hbf)車程22分鐘，多數時間20分鐘一班，繁忙時間10分鐘一班。141歐元***雙人房。比較偏遠，但服務超好，房大，仲有小食可以攞，咖啡機任用，茶包任沖! (試左佢四款Teekanne牌既，超好飲) 。附近全部係住宅，餐廳都冇間，好處係除非係酒店內有hihi，唔多嘈音，唔會有醉酒佬叫囂。整體五星推薦。

***啤酒節間酒店價格偏高，平時可能較平

~~~~~~~~~~~~~~~~~~~~~~~~~

我個邊既床頭櫃有本聖經。唔出po都冇事，出完po個晚就連發兩個惡夢。巴西同學只係覺得古怪，香港文化就覺得間房係有野

~完~
續：Day2